OP Vrydag 31 Augustus is die nuwe leerlingraad van die Hoërskool Cradock amptelik ingehuldig tot hul termyn. Hierdie groep van twintig leiers is die week vantevore verkies deur hul mede-leerders en onderwyser en sal vir die volgende twaalf maande die voortou neem met leerderbelange en dissipline by CHS. Hierdie raad sal saam met die personeel en bestuur van CHS ook help die skool se beeld uit te bou.
Tydens die seremonie, waar hul ouers en voogde ook teenwoordig was, het elke lid van hierdie nuutverkose raad ’n eed afgelê waarin hulle onderneem om te alle tye in die beste belang van die skool en sy leerders op te tree, waarna hulle die eed saam met hul ouers onderteken het.
Die Hoërskool Cradock is baie opgewonde oor die termyn wat vir hierdie leerdergraad voorlê. Hul geesdrif en energie is tasbaar en sal die dryfkrag wees agter elke aktiwiteit wat hulle as groep aanpak.
Die leerdergraad vertrek eersdaags op ’n leierskamp, aangebeid deur Quintus Smit van Pointman Leadership, waar hulle in ’n neutrale omgewing weg van skoolwerk mekaar beter kan leer ken. Tydens hierdie kamp sal die leerders ook bemagtig word om verskeie take en omstandighede, wat hulle in hul termyn kan teëkom, maklik en effektief te hanteer. Sterkte vir die jaar wat voorlê Kwaggas. Ons wens julle alle voorspoed toe en sou onguns oor jul pad kom, onthou: “NIL NISI NITENDO”.
