DRIE ondernemende oud-polisiemanne van Bloemfontein het Donderdag op Cradock aangekom op ’n staptog van 668 kilometer van Bloemfontein tot in Port Elizabeth.
Die mans, onder aanvoering van Deon van der Merwe, het hul eerste staptog van 1 005 km van Bloemfontein na Kaapstad in 2015 onderneem. “Die staptog was na my vrou, Johlene, haar moedige stryd van twintig jaar teen kanker verloor het.
“Ons wou met ons staptog geld vir kankernavorsing insamel en mense ook bewus maak van die siekte,” het Van der Merwe verduidelik.
Hulle het met die stap na Kaapstad, R41 000 vir Kansa Bloemfontein ingesamel.
Van der Merwe sê in November 2017 het sy vriende, wat almal voorheen in die polisie was, weer begin rusteloos raak en het hulle besluit om hierdie keer van Bloemfontein tot in Port Elizabeth te stap.
Hulle poog nog steeds om die R100 000 merk te haal en staan op die oomblik op meer as R6 000. Hulle het sover op die N1 oor Springfontein, Bethulie, Venterstad, Steynsburg, Hofmeyr tot in Cradock geloop. Hulle het op 7 Mei begin loop, lê elke dag ongeveer 45 km af en beoog om vandag (24 Mei) in Port Elizabeth aan te kom.
“Anderkant Cookhouse lê die Olifantskop-pas natuurlik vir ons voor, maar ons sal hom maar mak maak wanneer ons daar kom,” het van der Merwe gesê.
Hy sê baie keer stop mense hulle ’n geldjie in die hand langs die pad, maar hulle het ook ’n bankrekening vir donasies: ABSA Bank, Prellerplein, Kode 632005, Rekeningnommer 9335802217. Belangstellendes kan hulle op sosiale media by “Walk for Johlene2” volg.