PHILLENE Opperman is ’n besige plaasvrou wat saam met ’n vennoot hulle rekenaardienste-onderneming op Cradock be-dryf.
Sy is ook die ma van ’n jong dogtertjie wat graag perdry en uitblink op al die skoue in die omgewing.
Opperman het ingestem om een van haar gunsteling resepte met Mid-Karoo Express-lesers te deel. Sy het van Ouma se basaarpoeding ’n spoggerige affêre gemaak.
Ouma se basaarpoeding
Bestanddele
Een blikkie Ideal-ingedampte melk wat oornag in die yskas gehou is
Een blikkie karamel kondensmelk
Een pakkie suurlemoen- of pynappeljellie
Metode
- Maak die jellie met slegs een koppie water aan en laat dit toe om af te koel.
- Klits die ingedampte melk tot dubbel sy volume en meng dit met die karamel.
- Voeg die jellie by en laat dit stol in die yskas.
- Om die poeding bietjie op te tooi, kan dit in nagereg glasies bedien word en met gevriesde of vars bloubessies versier word.
- ’n Stafie “Cream Caramel” kan ook bo-oor die poeding in die glasies gerasper word om dit ’n ekstra iets te gee.